Charas petiziunarias, chars petiziunaris

Grazia fitg per Voss grond sustegn! En tschintg dis han suttascrit passa 330 persunas la petiziun a la Lia Rumantscha da betg stritgar per l’onn che vegn varga 60'000 francs a la GiuRu, a l’Uniun per litteratura rumantscha ed a la Societad Retorumantscha.

Sonda passada, ils 18 october, ha gì lieu a Samedan la radunanza da las delegiadas e dals delegiads. Ins ha pudì s’unir ad in consens minimal. I vegnan stritgads 41'000CHF empè da 63'000CHF:

La contribuziun per l’Uniun per litteratura rumantscha vegn reducida per 23'000CHF sin 5'000CHF per l’uniun e 10'000CHF garantids per ils Dis da litteratura a Domat. Cun quai èn anc adina periclitadas impurtantas lavurs da l’uniun e la revista «Litteratura». Il president da la Lia Rumantscha ha dentant punctuà che la Chasa editura rumantscha saja sin buna via, che la Lia Rumantscha veglia sa partecipar per 3 onns cun 60'000CHF or d’ina donaziun ch’ella haja survegnì. Il president ha dentant anc resalvas per in project garantì mo per trais onns, declera però al listess mument che la Lia na veglia betg garantir la continuitad da quel project. La Lia vegn a stuvair demussar che ses engaschament per la litteratura rumantscha è serius!
La contribuziun per la Societad Retorumantscha vegn reducida per 9'000CHF sin 5'000CHF per la societad e 7'000CHF garantids per las Annalas. Las rinfatschas dal president da la Lia envers la SRR ch’els hajan blers custs d’administraziun è nungistifitgà, gist da la vart da la Lia.
La contribuziun per la GiuRu vegn reducida per 9'000CHF sin 30'000 per las «Punts» ed acziuns da la GiuRu e mo pli 5'000CHF garantids per projects spezials anc da definir.

Quai è in consens minimal, el è vegnì acceptà cun 29 vuschs per e 4 vuschs cunter e 18 abstinenzas. La Lia Rumantscha sto ussa mussar concretamain ina politica da promoziun da progets generusa ed ina vaira «concentraziun e focussaziun» sin ses champ da lavur primar: la cultura rumantscha.

Sch’il president da la Lia di en ses preambel al rapport annual che la Lia stoppia sa «posiziunar cun il rumantsch sin differents champs che han ina connotaziun positiva, sco p.ex. il champ sport sco factur positiv e dinamic», di el implicitamain che l’incumbensa da basa da la Lia, numnadamain la cultura rumantscha ed era la litteratura rumantscha, na saja betg positiva e dinamica. Cun transferir questas valurs davent da la cultura ad auters champs, periclitescha la Lia l’image da sia atgna lavur.

Quai è privlus e n’è precis betg ina furma da sa concentrar e focussar sin ils champs da lavur centrals ed impurtants da l’uniun tetgala per servetschs e promoziun da cultura e lingua rumantscha.

Nus vegnin ad infurmar Tai vinavant areguard projects rumantschs e la lavur da la Lia Rumantscha. Sche Ti has in project da cultura u litteratura rumantscha, n’esitescha betg e fa ina dumonda a la GiuRu, a l’Uniun per la litteratura rumantscha u directamain a la Lia Rumantscha!

Ulteriuras infurmaziuns chattas ti qua: